Прилепскиот иноватор Ѕнда направи турбина што произведува струја од промаја

И додека целиот свет во моментов се бори за енергија плус, особено онаа бесплатната од обновливи извори, нашите иноватори за своите креации се одбивани од Фондот за иновации токму за вакви проекти. Прилепчанецот Зоран Тодороски - Sнда, по втор пат е одбиен од Фондот за својот проект ветерна турбина која може да создава енергија и од најмал провев преку т.н. вентури ефект. Ако турбината би се произведувала масовно, не би чинела повеќе од 500 евра и лесно може да ја монтира секое домаќинство.

„Да нема потреба од ангажирање од посебен инженерски тим за изградба, да нема посебни конструкции во различни ситуации туку едноставно да дојде универзален производ што може секој да го купи да речам од супермаркет и да го постави во својот двор. Користени се материјали од автомобили, од индустрии кои можат лесно да бидат заменети од било кој тим, да не треба специјални нарачки, чекање и слично“, истакна Зоран Тодороски – Ѕнда, иноватор.

Оваа турбина е планирано да произведува еден киловат на час. Колку пак турбината се зголемува толку ќе биде поголема и нејзината моќност. Оваа иновација особено може да биде многу корисна за разни објекти лоцирани на отворено поле или планини каде има повеќе ветар. За најоптимална заштеда Тодороски вели едно домаќинство треба да има комбинација од соларни панели во ваква турбина.

„За влог од 500 евра да се вади 1 киловат на час енергија знаеме дека не можи од ниту еден друг вид на обновливи извори на енергија, ниту од соларни панели, ниту од ништо. Зборувам дека комплетниот производ на крајот би требало да биде комплет со сите контролери, акумулаторски батерии, со инвертери, за да може директно да се приклучи на електричната мрежа. Едноставно замислите тука да имаме само штекер од 220 волти и во него веќе има акумулирано енергија. Електричата енергија планирано е да се складира во акумулатори, што исто така се предвидени да бидат од автомобилска индустрија, да нема потреба од некои специјални делови“, вели Тодороски.

Разочаран е бирократијата на нашиот Фонд за иновации и сега размислува своите со своите проекти да конкурира во странски Фондови.

„Ги работам и техничките цртежи, ја правам и анализата и буџетот и сите тие работи, не ангажирам од предложените Агенции од страна на Фондот што треба да го изработат тоа. И најчесто сум одбиван поради некоја анкета на странскиот пазар, јас до крај нема да го работам тоа бидејќи јас мислам дека како иноватор јас треба да направам иновација, а не да се занимавам со економија“, потенцира Тодороски.

Освен оваа Тодорски има уште голем број други иновации, како „Неврофон М1, помагало за глувите лица кое се носи на глава, модуларната мобилна ЦНЦ машина која може да се залепи на ѕид и да гравира, работи и на конструкција на роботи, а дури има разработено и идеја како би функционирал мотор за вселенска станица кој не бара гориво, освен струја.