Захариев: Штип ќе воведе субвенциониран јавен градски превоз
Градоначалникот на Штип и кандидат на ВМРО-ДПМНЕ за истата функција, Илчо Захариев најави воведување на градски превоз, кој ќе биде еден вид на јавно-приватно партнерство со заинтересирани фирми на превозници, при што локалната самоуправа ќе субвенционира дел од патниот билет.
– Организирањето на јавен превоз во градот и приградските наслеби е важен проект за општината бидејќи ова е голем проблем за населението во Овчеполието, кон соседната општина Карбинци и во Лаквичко. Организацијата ќе биде направена на тој начин што локалната самоуправа ќе субвенионира 50% од автобуската карта. Ние веќе имаме и заинтересирани компании за тоа. Ќе имаме дневен превоз од Три Чешми, од Чардаклија секојдневно, како и од Стар Караорман, а ќе ја поврземе и општина Карбинци со секојдневен превоз од Таринци и Карбинци. Исто така ќе ги поврземе и населбите од градот, Баби, Сењак, Автокоманда со центарот на Штип, во делот на Лакавичко до селата ќе има секојдневен превоз а за Овчеполските села, Врсаково и Криви Дол ќе организираме превоз за време на викендите. Мислам дека на овој начин ќе се помогне и на учениците и на студентите и на пензионерите, рече тој.
Според Захариев, ќе се помогне и на руралните места каде многу граѓани имаат земјоделски површини и ги обработуваат за време на викендите. Деталите за проектот се во завршна фаза иако според првичните размислувања:
– Линиите до центарот на Штип ќе одат на половина час, автбусот ќе кружи и ќе тргнува од одредена позиција, најверојатно од Трговскиот центар, па преку населбите Осми ноември, Автокоманда, Сењак, Дузлак и Баби и ќе прави круг.
Според Захариев, само со оваа линија ќе се поврзе највиталниот дел на градот каде живеат 30.000 луѓе.
12.10.2017 - 10:29
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
